Laura Bush lofar gjörðir Mubaraks

Laura Bush, forsetafrú Bandaríkjanna, hrósaði í dag Hosni Mubarak, forseta Egyptalands, fyrir að breyta lögum um forsetakjör í landinu. Frú Bush er nú á ferðalagi um Miðausturlönd og heimsótti Egyptaland í dag. Þar lauk hún lofsorði á stjórnarskrárbreytingu sem Egyptar kjósa um á miðvikudaginn og kveður á um að fleiri en einn geti boðið sig fram til forseta. Stjórnarandstaðan í Egyptalandi er hins vegar á öðru máli og hefur m.a. bent á að þau skilyrði sem sett eru í hinum nýju lögum um kjörgengi manna séu of ströng til þess að nokkur annar en Mubarak eða menn úr hans flokki geti boðið sig fram, en sá flokkur hefur yfirgnæfandi meirihluta á þingi. Hafa stjórnarandstæðingar hvatt Egypta til að sniðganga þjóðaratkvæðagreiðsluna á miðvikudag.