Gömul íbúð páfa til sölu á eBay

Íbúð sem nýkjörinn páfi, Benedikt sextándi, leigði fyrir um 40 árum nærri borginni Bonn í Þýskalandi er nú boðin til sölu á uppboðsvefnum eBay. Joseph Ratzinger, sem tók sér nafnið Benedikt sextándi eftir páfakjör, bjó í íbúðinni á árunum 1959-1963 þegar hann kenndi guðfræði við háskóla þar í borg. Ríflega þrettán þúsund manns hafa skoðað íbúðina á uppboðsvefnum frá því að myndir af henni birtust á föstudag. Ekki er gefið upp hversu mikið hefur verið boðið í íbúðina en áhugasamir hafa enn 27 daga til að gera eiganda íbúðarinnar tilboð. Skemmst er að minnast þess að sex ára gamall Volkswagen Golf sem Benedikt sextándi átti seldist á tæplega 239 þúsund dollara, eða 15,5 milljónir króna, á eBay.