Fox verst gagnrýni á ummæli

Vicente Fox, forseti Mexíkó, reyndi í gær að skýra ummæli sem hann lét falla og fulltrúar bandarískra blökkumanna tóku mjög illa. Fyrr í mánuðinum var haft eftir Fox í útvarpsviðtali að Mexíkanar í Bandaríkjunum tækju þar að sér störf "sem ekki einu sinni svartir vilja". Fox tjáði sig fyrst í gær um þau viðbrögð sem ummæli hans fengu og sagði að þau hefðu verið mistúlkuð. Hann hefði í umræddu viðtali verið að gagnrýna ströng ný innflytjendalög sem bandaríska öldungadeildin samþykkti fyrir skemmstu, en hún setur fjölda mexíkóskra ríkisborgara í Bandaríkjunum í vanda.