Rúmenskir gíslar lausir í Írak

Þrír rúmenskir fréttamenn og írask-bandarískur túlkur þeirra voru í gær látnir lausir úr gíslingu sem íraskir uppreisnarmenn hnepptu þá í fyrir tveimur mánuðum. Frá þessu greindu talsmenn Rúmeníuforseta. Gíslarnir fjórir voru allir komnir í umsjá rúmenskra yfirvalda, að því er Adriana Saftoiu, talsmaður Traians Basescu Rúmeníuforseta, greindi frá í Búkarest. "Þeir eru allir heilir á húfi og við munum tilkynna síðar hvenær þeir snúa aftur heim," sagði hún. Rúmenunum þremur - blaðamanninum Ovidiu Ohenasian, sjónvarpsfréttakonunni Marie-Jeanne Ion og myndatökumanninum Sorin Miscoci - var rænt á græna svæðinu í Bagdad þann 28. mars síðastliðinn, ásamt leiðsögumanni þeirra, Mohammed Monaf. Mannræningjarnir höfðu hótað að drepa alla gíslana ef rúmensk stjórnvöld kölluðu rúmenska herliðið ekki tafarlaust heim frá Írak. 800 rúmenskir hermenn þjóna sem hluti af fjölþjóðlegu setuliði undir forystu Pólverja í Mið-Írak.