Karzai krefst refsinga

Hamid Karzai, forseti Afganistans, krafðist þess í gær að Bandaríkjaher gengi hart fram í að draga þá liðsmenn hersins til ábyrgðar sem gerst hefðu sekir um að misþyrma föngum í Afganistan. The New York Times birti á föstudag upplýsingar sem lekið var úr tvö þúsund síðna skýrslu um rannsókn á ásökunum um fangamisþyrmingar í aðalherstöð Bandaríkjahers í Afganistan. Svo vildi til að sama dag lagði Karzai Afganistanforseti upp í fjögurra daga opinbera heimsókn til Bandaríkjanna. Er hann ávarpaði blaðamenn á Kabúlflugvelli hét hann því að ræða málið við bandaríska ráðamenn. Hann sagðist líka mundu krefjast þess að aðgerðir Bandaríkjahers í landinu sættu meira eftirliti, ekki síst skyldi bundinn endi á að bandarískir hermenn réðust inn á heimili manna og handtækju án þess að tilkynnt væri um aðgerðirnar til afgönsku stjórnarinnar. Í grein New York Times um illa meðferð bandarískra hermanna á afgönskum föngum í herstöð Bandaríkjamanna við Bagram-flugvöll norður af Kabúl er vitnað í trúnaðarupplýsingar úr skýrslu rannsóknarnefndar sem rannsakaði ásakanirnar. Efnt var til rannsóknarinnar eftir dauða tveggja fanga þar í desember 2002. "Mér ofbýður gersamlega. Við fordæmum þetta. Við viljum að Bandaríkjastjórn grípi til mjög afgerandi ráðstafana til að sjá til þess að slíkir menn starfi ekki í herliði hennar í Afganistan," tjáði Karzai blaðamönnum en tók fram að glæpsamlegar gerðir þessara hermanna sem í hlut ættu skyldu ekki verða landsmönnum hans tilefni til að draga þá ályktun að allir Bandaríkjamenn væru slæmir. "Íbúar Bandaríkjanna eru vænsta fólk," sagði hann. Trent Duffy, talsmaður Hvíta hússins, sagði að George W. Bush Bandaríkjaforseti væri hneykslaður á hinum meintu fangamisþyrmingum og vildi að vandleg rannsókn færi fram. Duffy sagði að rannsóknin beindist nú einkum að sjö sakborningum sem þjónað hefðu í Bagram-herstöðinni.