Afsögn verði stjórnarskrá felld

Forseti Evrópusambandsins segir að hafni Frakkar stjórnarskrá Evrópusambandsins þýði það endalok hennar. Andstæðingar ríkisstjórnarinnar í Frakklandi krefjast þess að hún segi af sér ef almenningur hafnar stjórnarskránni. Jean Claude Junker, forsætisráðherra Lúxemborgar og núverandi forseti Evrópusambandsins, segir að verði stjórnarskránni hafnað í Frakklandi verði ekki gerð tilraun til þess að endurgera hana og leggja hana fyrir dóm almennings í Evrópu með breyttu sniði. Hafni almenningur í Frakklandi stjórnarskránni þýði það einfaldlega að Evrópusambandið hafi færst tuttugu ár aftur í tímann og að Frakkar muni ekki lengur leiða Evrópu. Að hans mati myndi slík niðurstaða þýða endalok stjórnarskrárinnar. Aðeins níu dagar eru þangað til kosið verður um stjórnarskrána í Frakklandi og benda skoðanakannanir undanfarinna daga til þess að mjög mjótt verði á mununum. Þó hafa fimm skoðanakannanir í röð bent til þess að naumur meirihluti Frakka ætli að hafna stjórnarskránni. Jean Marie Le-Pen, leiðtogi þjóðernissinna í Frakkalandi, sagði í dag að það væri réttast af ríkisstjórn Jacques Chirac að segja af sér ef svo færi að þjóðin myndi hafna stjórnarskránni enda væri ekki hægt að túlka það öðruvísi en beina gagnrýni almennings á stefnu ríkisstjórnarinnar almennt. Neðri deild belgíska þingsins samþykkti stjórnarskrá Evrópusambandsins í dag með yfirgnæfandi meirihluta. Stjórnarskráin á þó enn eftir að velkjast aðeins um í stjórnkerfinu í Belgíu áður en hún verður endanlega samþykkt en það ætti að vera formsatriði. Ekki verður haldin þjóðaratkvæðagreiðsla um stjórnarskrána í Belgíu. Spánn, Ítalía, Grikkland, Ungverjaland, Litháen, Slóvakía og Slóvenía hafa þegar samþykkt stjórnarskrána en enn á eftir að greiða um hana atkvæði í sautján löndum.