Hraðskreiðasti rússíbani heims

Það er ekki á hverjum degi sem menn komast á meira en tvö hundruð kílómetra hraða undir berum himni. Jafnvel allra hörðustu adrenalínfíklar ættu ekki að verða fyrir vonbrigðum með nýja rússíbanann sem opnaður var í New Jersey í gær. Hann er sá stærsti og hraðskreiðasti í heiminum, meira en140 metra hár og fer mest á u.þ.b. 206 kílómetra hraða. Aðeins átján komast í farartækið í einu og voru sætin í fyrstu ferðina boðin upp á heimasíðu eBay. Dýrustu sætin fóru á meira en hundrað þúsund krónur íslenskar og rann ágóðinn til langveikra barna.