Lítið lyktarskyn vísar á elliglöp

Rannsóknir sænskra lækna við Karólínska sjúkrahúsið benda til þess að hægt verði að uppgötva ýmsa sjúkdóma tengda elliglöpum með því að kanna lyktarskyn fólks. Með elliglöpum er til dæmis átt við sjúkdóma á borð við Alzheimers. Í ljós kom að hópur sjúklinga sem þjáðist af vægum Alzheimers-einkennum brást öðruvísi við vanillulykt en viðmiðunarhópur heilbrigðra. Svörun við lyktinni var mæld með blóðflæði í heilaberki og jókst það hjá þeim sem heilbrigðir voru en ekki hjá hinum sjúku. Segja læknarnir að með þessum hætti megi merkja minnkandi heilastarfsemi og þannig uppgötva elliglöp á byrjunarstigi.