Reyni að svæla fjölmiðla burt

Lögfræðingar rússneska auðjöfursins Míkhaíls Khodorkovskís segja að dómararnir séu að reyna að svæla af sér fjölmiðla með því að draga dómsuppkvaðninguna á langinn. Réttarhöldin yfir Míkhaíl Kodorkovskí hafa komið sér illa fyrir Rússa þar sem á Vesturlöndum er litið á þau sem aðför Vladímírs Pútíns að pólitískum andstæðingum sínum. Dómsuppkvaðningu í máli hans var til dæmis frestað fram yfir hátíðahöldin í tilefni þess að sextíu ár voru liðin frá lokum síðari heimsstyrjaldarinnar. Dómsúrskurðurinn er mikill að vexti og var búist við að það tæki nokkra daga að lesa hann upp. Dómararnir hafa hins vegar farið sér mjög hægt og gert mörg hlé á upplestrinum. Er sagt í dómskerfinu að það geti tekið nokkrar vikur að lesa úrskurðinn upp. Lögfræðingar Khodorkovskís eru reiðir. Robert Amsterdam, einn þeirra, segir að þeir séu bæði gramir og þreyttir. Aðferð dómaranna sé úthugsuð tilraun til þess að þreyta þá og verjendurna til að tryggja að fjölmiðlar missi áhuga á viðburðinum. Réttarhöldin yfir Khodorkovskí eru hitamál í Rússlandi. Sumir eru á móti honum og telja að hann hafi auðgast á óeðlilegan hátt. Aðrir styðja hann fyrir að standa upp í hárinu á Pútín og vilja jafnvel fá hann fyrir forseta.