Hugsanlega ákærður fyrir manndráp

Lögreglumaður sem skaut Víetnama til bana í Larvik í Noregi í gær gæti átt yfir höfði sér ákæru fyrir manndráp af gáleysi. Víetnaminn, sem var liðlega þrítugur, var vopnaður hnífi og kjötöxi og var samkvæmt vitnum ógnandi og neitaði að láta vopnin af hendi. Þegar hann síðan gekk í átt að lögreglumönnunum var hann skotinn og sagði lögreglumaðurinn sem skaut hann að það hefði verið gert í nauðvörn. Þetta átti sér stað í íþróttavöruverslun í bænum og segir eigandi hennar að lögreglumaðurinn hafi bjargað fjölda mannslífa með því að skjóta manninn. Innra eftirlit lögreglunnar rannsakar nú málið og ef í ljós kemur að ekki var um nauðvörn að ræða verður lögreglumaðurinn ákærður.