Gerðu 240 kíló af heróíni upptæk

Afganska lögreglan gerði rúmlega 240 kíló af heróíni upptæk og eyðilagði nokkrar tilraunastofur þar sem eiturlyf vour búin til í áhlaupi á nokkra staði í Nangahar-héraði í austurhluta landsins. Þá lögðu fíkniefnalögreglumenn einnig hald á töluvert af efnum til eiturlyfjagerðar. Afganistan er mesta ópíumframleiðsluríki heims, en 87 prósent alls heróíns í heiminum koma frá landinu og ræktun þess nemur 60 prósentum af landsframleiðslu Afganistans. Stjórnvöld hafa hins vegar skorið upp herör gegn eiturlyfjaframleiðslu með aðstoð Bandaríkjamanna og orðið nokkuð ágengt að undanförnu.