Urðu við óskum Castro

Eftir áeggjan Kúbverja hafa Bandaríkjamenn handtekið kúbverskan mann sem grunaður er um að hafa framið hryðjuverk fyrir tæpum þrjátíu árum síðan. Tugþúsundir Kúbverja hlýddu ákalli leiðtoga síns, Fidel Castro, og fóru í kröfugöngu að bandarísku sendiskrifstofunni í Havana á mánudaginn. Með göngunni vildu yfirvöld á Kúbu knýja Bandaríkjamenn til að handtaka Luis Posada Carriles, 77 ára Kúbverja sem sagður er hafa grandað kúbverski farþegaflugvél með 73 manns innanborð árið 1976. Castro styður kröfur Venesúelamanna um að fá Carriles framseldan en hann var áður á mála hjá CIA og venesúelsku leyniþjónustunni. Hann hefur sótt um pólitískt hæli í Bandaríkjunum. Castro var í fylkingarbrjósti göngumanna og hrópaði slagorð gegn hryðjuverkum og "kenningum og aðferðum nasista". Hann sagði það ótrúlega hræsni af hálfu Bandaríkjamanna ef þeir myndu láta undir höfuð leggjast að handtaka menn sem hefðu framið hryðjuverk gegn Kúbverjum á meðan þeir heyja stríð gegn hryðjuverkum annars staðar í heiminum. Á þriðjudaginn brugðust Bandaríkjamenn við áskoruninni og handtóku Carriles í Miami í Flórída. Ekki er þó víst að hann verði framseldur.