Al-Zarqawi kyndir undir ófriðarbál

Uppreisnarmenn skutu undirhershöfðingja í íraska innanríkisráðuneytinu til bana í gær. Hátt settir bandarískir erindrekar í landinu segja að ofbeldisalda undanfarinna vikna sé hryðjuverkamanninum Abu Musab al-Zarqawi að kenna. Rósturnar í Írak héldu áfram í gær sem aldrei fyrr. Setið var fyrir bifreið Ibrahim Khamas undirhershöfðingja í Bagdad í gær og hann skotinn til bana. Í síðustu viku voru tveir starfsmenn innanríkisráðuneytisins drepnir en það fer með öryggis- og lögreglumál. Samtök Jórdanans al-Zarqawi, forsprakka al-Kaída í Írak, viðurkenntu fljótlega að hafa staðið á bak við tilræðið. Bandarískur embættismaður í Írak greindi frá því í gær að al-Zarqawi hefði boðað fylgismenn sína til fundar í Sýrlandi í síðasta mánuði til að hvetja þá til dáða í baráttunni gegn hernámsliðinu og íröskum bandamönnum þess. Á hann að hafa hvatt til að bílsprengjur yrðu notaðar í ríkari mæli. Í síðasta mánuði var 21 bílsprengjuárás gerð í Bagdad, samanborið við 25 allt síðasta ár. Lík sjö manna fundust í gær í bænum Amiriyah vestur af Bagdad. Var greinilegt að mennirnir höfðu verið teknir af lífi.