Ræddi mannréttindi við Hu Jintao

Ólafur Ragnar Grímsson forseti Íslands átti viðræður við Hu Jintao, forseta Kína, í Höll alþýðunnar í dag. Ólafur Ragnar sagði í samtali við fréttamenn eftir fundinn að viðræðurnar hefðu verið mjög gagnlegar. Honum hefði komið á óvart hversu vel forseti Kína hefði verið inni í málum þeirra íslensku fyrirtækja sem bar á góma í viðræðunum. Hann sagði að forseti Hu Jintao hefði verið reiðubúinn að ræða mannréttindamál og lýðræði og sagðist vonast til þess að hann fengi tækifæri til að ræða við fulltrúa stjórnmálaflokka og almannahreyfinga á Íslandi sem hann kvaðst vona að kæmu til Kína. Ólafur sagðist einnig hafa tekið upp í viðræðunum samstarf þjóðanna í menntamálum og málefnum fatlaðra, þar á meðal samstarf þjóðanna í undirbúningi Ólympíuleika fatlaðra og Special Olympics, sem haldnir verða í tengslum við Olympíuleikana í Beijing 2008. Fyrr um daginn áttu forsetinn og fulltrúar stoðtækjafyrirtækisins Össurar fund með Deng Pufang, formanni Samtaka fatlaðra í Kína, en hann er sonur Deng Xiao Pings fyrrum Kínaleiðtoga. Sá fundur var sérlega gagnlegur að sögn talsmanns Össurar.