Rafsanjani í forsetaframboð

Akbar Hashemi Rafsanjani, fyrrverandi forseti Írans, mun bjóða sig fram til embættisins aftur. Þetta hefur Reuters-fréttastofan eftir nánum aðstoðarmönnum hans í dag. Þeir segja að von sé á yfirlýsingu frá forsetanum fyrrverandi innan nokkurra stunda. Rafsanjani, sem er sjötugur, var við völd í landinu á árunum 1989-1997 en hann er hófsamur íhaldsmaður sem þykir hallur undir Vesturlönd. Rafsanjani hafði áður ýjað að því að hann myndi gefa kost á sér en stuðningsmenn hans sögðu hann þó í vafa vegna þrýstings frá harðlínumönnum í Íran. Rafsanjani er talinn sigurstranglegur í forsetakosningunum sem fara fram um miðjan næsta mánuð og ljóst er að kjör hans myndi gleðja vestræna erindreka sem m.a. deila nú við Írana um kjarnorkuáætlun landsins.