Pútín heitir Palestínumönnum hjálp

Vladimír Pútín Rússlandsforseti hét því í gær að sjá leiðtogum Palestínumanna fyrir þyrlum og öðrum búnaði og þjálfun til að hjálpa palestínskum yfirvöldum að framfylgja lögum og reglu á Gazaströndinni og þeim hlutum Vesturbakkans sem Ísraelar hafa heitið að fara frá í sumar. Í fyrstu heimsókn valdhafa í Moskvu til palestínsku heimastjórnarsvæðanna hét Pútín því einnig að Rússar myndu aðstoða við uppbyggingu innviða Palestínu í aðdraganda þess sem á að geta orðið sjálfstætt ríki Palestínumanna. Af tillitssemi við Ísraela tók Pútín fram að öll sú aðstoð sem Rússar myndu veita yrði veitt með fullu samráði við báða aðila.