Ólöf að leika vel á Spáni

Ólöf María Jónsdóttir, kylfingur úr Golfklúbbnum Keili, lék þriðja hringinn á Tenerife-mótinu á evrópsku kvennamótaröðinni í golfi á 72 höggum eða pari vallarins. Hún hefur því leikið hringina þrjá á 218 höggum eða tveimur höggum yfir pari. Ólöf María spilaði tólf holur á pari vallarins, þrjár á fugli og þrjár á einu höggi yfir pari. Hún var lengi á einu höggi undir pari en fékk skolla á fimmtándu holu og endaði því á pari. Hún er í 32. til 40. sæti fyrir lokahringinn en Ludivine Kreutz frá Frakklandi er efst en hún hefur leikið holurnar 54 á níu höggum undir pari. Ólöf María sagði í samtali við Fréttablaðið í gær að hún væri mjög sátt við spilamennsku sína síðustu tvo dagana. "Ég var búin að bíða síðan í nóvember eftir þessu móti og það hafði sín áhrif á leik minn fyrsta daginn. Síðan hef ég spilað vel og stefnan er að halda áfram á sömu braut," sagði Ólöf María sem stefndi að því fyrir mótið að verða á meðal þrjátíu efstu á mótinu."Það þýðir ekkert fyrir mig að hugsa um að spila á ávkeðnum höggafjölda. Það eina sem gildir er að reyna að fá fram stöðugleikann. Ef ég spila lokahringinn eins og ég hef spilað síðustu tvo þá yrði ég hæstánægð."