NBA í nótt

Nokkrir leikir voru á dagskrá í NBA deildinni í körfuknattleik í nótt. Þar bar hæst að Minnesota Timberwolves virðast vera aðeins að vakna til lífsins eftir magra tíð undanfarið og unnu í nótt sigur á Charlotte Bobcats 102-97, ekki síst fyrir stórleik Kevin Garnett sem skoraði 30 stig og hirti 15 fráköst. Los Angeles Lakers þurftu að bíta það súra epli að tapa fyrir lægra skrifuðum grönnum sínum Clippers 110-101, þrátt fyrir 41 stig frá Kobe Bryant og verður draumur Lakers um sæti í úrslitakeppninni á fjarlægari, því auk þess að vera í veikri stöðu í riðli sínum, á liðið eftir erfitt prógramm á tímabilinu þar sem það leikur fjölmarga útileiki. Cleveland Cavaliers náðu að afstýra sjöunda tapi sínu í röð, þegar liðið lagði Orlando Magic 111-92.  LeBron James og Drew Godden voru stigahæstir í liði heimamanna, sem var ákaft stutt af nýjum hluthafa í félaginu, tónlistarmanninum Usher, sem lofaði öllum í húsinu sigri eftir fyrsta leikfjórðunginn. San Antonio Spurs völtuðu yfir New Jersey Nets 90-74 og nutu frekar óvænt krafta Tim Duncan sem spilaði þrátt fyrir að vera meiddur á ökkla.  Það var hinsvegar varamaðurinn Devin Brown sem stal senunni í leiknum og var stigahæstur í liði heimamanna í Spurs með 22 stig. New York Knicks unnu sjöunda leik sinn í röð á heimavelli þegar þeir lögðu Washington 93-83 og eru nú skyndilega farnir að eygja möguleika á að komast í úrslitakeppnina eftir að hafa unnið 5 af síðustu 6 leikjum sínum.  Jamal Crawford var stigahæstur í jöfnu liði heimamanna með 19 stig.