600 þúsund bollur

Árleg sælkerahátíð er í farvatninu. Hún hefst með bolluhelginni miklu sem jafnan stendur frá laugardegi til mánudags og lýkur á þriðjudag með saltkjöti og baunum. Sumir laumast svo í sælgætispoka barna sinna að kveldi öskudags. Reyndar hafa bollur fengist í nokkrum bakaríum síðustu daga því sumir bakarameistarar hófu bollubakstur og sölu um síðustu helgi, tíu dögum fyrir bolludag. Heimildir Fréttablaðsins herma að bollusalan um síðustu helgi hafi verið góð enda margir sem standast ekki mátið þegar þeir sjá súkkulaðigljáðar, rjómafylltar bollurnar blasa við í borðum bakaríanna. "Við þessir gömlu byrjum ekki fyrr en á föstudag [á morgun]," segir Reynir Þorleifsson, bakari í Bakaríinu Dalvegi og formaður Landssambands bakarameistara. Hann hefur bakað margar bollur um ævina, á enda þrjátíu ár að baki í faginu. "Þetta er mikil vertíð og sunnudagarnir eru jafnvel stærri en sjálfur bolludagurinn," segir Reynir. Hann veit sem er að vinsældir bollunnar eru gríðarlegar og vaxa ár frá ári. "Það hefur verið aukning hjá mér um hátt í þúsund bollur á ári." Hann bakar sumsé fimm þúsund bollum meira í ár en fyrir fimm árum. Sjálfur er hann hógvær í neyslunni og borðar bara bollur á bolludeginum. Snertir þær ekki dagana á undan. Finnst þær samt mjög góðar. Og uppskriftin er fyrir löngu orðin klassísk."Bollan hefur lítið breyst en ef eitthvað er hafa gæði aukist." Það telst þó fréttnæmt að vatnsdeigsbollan er í stöðugri sókn. "Þær eru komnar uppundir helming af öllum bollum og jafnvel yfir það," segir Reynir bakari og skýtur á að meðalverð á bollum sé um 220 krónur. Reynir játar að samkeppni bakaría sé hörð en telur hana eðlilega. "Ég held að menn séu ekki að klóra augun hver úr öðrum. Þetta er bara eins og það á að vera."