Seattle sigraði í Staples Center

Kobe Bryant lék ekki með LA Lakers sem beið lægri hlut fyrir Seattle. Vladimir Radamonovic skoraði 26 stig í 104-93 sigri Seattle, þeim fyrsta í Staples Center í 6 ár. Þá var mikið skorað í Madison Square Garden þar sem heimamenn í New York Knicks réðu ekkert við Phoenix Suns. Suns sigraði 133-118. Fjórir leikmenn í liði Suns skoruðu yfir 20 stig en Jamal Crawford var atkvæðamestur hjá Knicks og skoraði 40 stig. Boston sigraði Charlotte 97-92, Memphis vann Orlando 95-83 og Sacramento sigraði New Jersey 113-93. Loks vann Chicago Bulls enn eina ferðina, lagði Denver að velli 111-107. Chicago hefur unnið 11 af síðustu 12 leikjum sínum.