Magic endaði sigurgöngu Pistons

Orlando Magic, með Steve Francis í broddi fylkingar, batt enda á sigurgöngu Detroit Pistons í NBA-körfuboltanum í fyrrinótt, 103-101, en liðin mættust nokkrum dögum áður þar sem Pistons hafði betur. Magic hefur þar með unnið 21 leik sem eru jafnmargir sigurleikir og liðið náði á síðasta tímabili. Francis var stigahæsti maður vallarins með 32 stig, tók 12 fráköst og gaf 6 stoðsendingar. Hann átti mikilvæga stoðsendingu á Doug Christie, sem er nýkominn til Magic frá Sacramento Kings, á lokamínútunum þar sem Christie setti niður mikilvæga þriggja stiga körfu. "Ég hef alltaf sagt að sjái ég opna manninn, þá mun ég alltaf gefa á hann," sagði Francis sem nældi sér í sína tíundu tvöföldu tvennu á leiktíðinni.