Málþing um skólagöngu hjartveikra barna

Skólaganga hjartveikra barna er um margt ólík skólagöngu heilbrigðra barna og koma þarf til móts við þau í skólakerfinu. Í dag verður haldið málþing í Gerðubergi þar sem skólaganga þeirra verður til umfjöllunar. Tilefnið er tíu ára afmæli Neistans, styrktarfélags hjartveikra barna.

Á málþinginu, sem ber yfirskriftina Mér um hug og hjarta nú, verður fjallað um reynslu hjartveikra barna af skólagöngu og þær breytingar sem taldar eru æskilegar á starfi skólanna til að koma til móts við þau og aðstandendur þeirra.

Meðal umfjöllunarefna á málþinginu eru laga og réttindaramminn; reynslan af skólakerfinu; sérstaða hjartveikra barna; aðstaða til að sinna þeim innan skólans og áhrif streitu á námsárangur hjartveikra barna og systkina. Flutt verða erindi bæði af fagmönnum og foreldrum hjartveikra barna.