Nýtt skip í stað Jaxlisins

Flutningaskipið Jaxlinn sem selt var til Danmerkur um miðjan þennan mánuð fær fljótlega arftaka. "Og það verður enginn eftirbátur hans," segir Ragnar Magnús Traustason, framkvæmdastjóri Sæskipa sem gerðu út Jaxlinn.

"Við höfum augastað á skipi sem er af sömu stærð og breidd og Jaxlinn en er þó hannað þannig að það getur tekið mun fleiri gáma. Nú er það bara spurningin hvenær þetta skip losnar úr sínum verkefnum," segir Ragnar en vill engu spá um hvenær það geti orðið. "Óska­staðan var sú að fá skipið strax eftir að Jaxlinn fór en af því gat ekki orðið og þá er ekkert annað að gera en bíta á jaxlinn," bætir hann sposkur við.

Guðmundur Kristjánsson, hafnarvörður á Ísafirði, segir söknuð að Jaxlinum. "Hann var tryggur, alltaf á áætlun og var fólki hér mikilvægur enda mikilvægt að sem mest fjölbreytni sé í flutningum á svæðinu. Það mætti frekar greiða niður sjóflutninga en landflutningana en ég lít svo á að þeir séu niðurgreiddir meðan bílstjórar greiða ekki þann olíuskatt sem áætlað var að setja á þá í sumar," segir hafnarvörðurinn.