Valdahlutföllin að breytast

Valdahlutföllin í Alþjóðahvalveiðiráðinu eru að breytast hvalveiðiþjóðunum í vil. Japanar hugsa sér gott til glóðarinnar á ársfundi ráðsins sem hefst í næstu viku en íslenska sendinefndin varar þó við of mikilli bjartsýni. Ársfundur Alþjóðahvalveiðiráðsins fer fram í Ulsan í Suður-Kóreu 27. maí - 24. júní næstkomandi og sem fyrr skiptast aðildarríkin mjög í tvö horn í afstöðu sinni til veiðanna. Síðustu ár hafa hvalveiðiþjóðir á borð við Íslendinga og Japana ekki riðið feitum hesti frá þessum samkomum en svo virðist sem valdahlutföllin séu að breytast í ráðinu. Joji Morishita, fulltrúi í japönsku sendinefndinni á fundinum, telur að forskot ríkjanna sem aðhyllast veiðibann sé aðeins eitt eða tvö atkvæði og því er af sem áður var. "Vatnaskil gætu orðið á þessum fundi." sagði hann í samtali við AP-fréttastofuna í gær. Undir þetta tekur Ásta Einarsdóttir, varaformaður íslensku sendinefndarinnar sem bendir á að tvö ný ríki séu að koma inn í ráðið sem séu hlynnt hvalveiðum: Malí og Kíribatí. Þar við bætist að ákveðinn miðjuhópur hefur verið að myndast innan ráðsins en í honum eru ríki á borð við Bandaríkin, Holland og Svíþjóð. Þau hafa tekið virkan þátt í stefnumótun um að komið verði á stjórnkerfi á hvalveiðum innan Alþjóðahvalveiðiráðsins, svonefnt RMS-kerfi. Ásta segir að talsverðar umræður hafi farið fram um RMS-kerfið undanfarna mánuði en þær hafi þó ekki skilað eins miklu og vonast hafi verið til. "Ef þetta verður hins vegar samþykkt þá mun það hafa mjög mikla þýðingu fyrir okkur Íslendinga því það þýddi einfaldlega að atvinnuveiðar yrðu leyfðar með ákveðnum skilyrðum. Við reynum eins og við getum að koma þessu í höfn á fundinum en því miður eru ekki alltof miklar líkur á því, maður má ekki vera of bjartsýnn."