Ebola-veirunnar vart í V-Kongó

Ebola-veirunnar hefur aftur orðið vart í Vestur-Kongó og hafa níu manns látist af hennar völdum frá apríllokum. Frá þessu greindi Alþjóðaheilbrigðisstofnunin í dag. Veiran fannst í norðvesturhluta landsins en þar létust um 150 manns af sömu orsökum fyrir tveimur árum. Heilbrigðisyfirvöld í Vestur-Kongó, Alþjóðaheilbrigðisstofnunin og Læknar á landamæra eru á vettvangi og í viðbragðsstöðu, en talið er hugsanlegt að veiran hafi borist í fólkið úr sýktu apakjöti. Engin lækning er til við Ebola-veirunni en hún berst á milli manna með líkamsvessum og 50-90 prósent þeirra sem sýkjast, deyja. Ebola-veiran olli mestu manntjóni fyrir tíu árum þegar rúmlega 250 manns létust í Austur-Kongó af hennar völdum.