Kalla á stórherferð gegn alnæmi

Níutíu milljónir Afríkubúa, eða tíu prósent álfunnar, gætu sýkst af alnæmisveirunni á næstu tuttugu árum ef ekkert verður að gert. Sameinuðu þjóðirnar vilja stórherferð í álfunni og 200 milljarða dollara til að berjast gegn sjúkdómnum. 25 milljónir manna í Afríku eru sýktar af alnæmisveirunni og er alnæmi algengasta dánarorsök fólks í Afríku og fjórða algengasta dánarorsökin í heiminum. Kofi Annan, framkvæmdastjóri Sameinuðu þjóðanna, hefur farið hörðum orðum um viljaleysi þjóðarleiðtoga og voldugustu manna alþjóðasamfélagsins til að berjast gegn sjúkdómnum og gagnrýnir ráðamenn sem horfa aðgerðarlausir á milljónir alnæmissjúklinga í fátækum ríkjum deyja úr sjúkdómnum einungis vegna skorts á læknis- og lyfjameðferð, sem þó sé hægt að útvega. Nú er þremur milljörðum dollara varið á ári til fræðslu, lyfjagjafa og meðhöndlunar en samt eykst fjöldi þeirra sem sýkist stöðugt. Framkvæmdastjóri alnæmisáætlunar Sameinuðu þjóðanna, Peter Piot, segir í nýrri skýrslu um málið að ekkert dugi nema stórherferð til að stöðva þessa þróun. Þörf sé á 200 milljörðum bandaríkjadala eða 12 þúsund milljörðum íslenskra króna. Hann segir að líta verði á alnæmi sem alvarlegan heimsfaraldur sem gæti lagt heilu samfélögin í rúst. Með herferð og fjármagni væri jafnvel hægt að koma í veg fyrir að 16 milljónir í álfunni létust úr sjúkdómnum og að 43 milljónir manna smituðust af HIV-veirunni. Skýrslu Sameinuðu þjóðanna lýkur með þeim orðum að ef enn verði milljónir Afríkubúa sýktar af alnæmi eftir 20 ár sé það ekki vegna þess að ekki hafi verið hægt að koma í veg fyrir það.