Meistararnir steinlágu fyrir HK

Óvænt úrslit urðu í riðli 2 í deildarbikarkeppni karla í knattspyrnu í dag þegar Íslandsmeistarar FH steinlágu fyrir HK, 3-0 í Fífunni í Kópavogi. HK er þar með komið á toppinn með 6 stig. Mikil forföll voru hjá HK og vantaði átta leikmenn í hópinn vegna meiðsla en það kom þó ekki í veg fyrir stórsigur á Íslandsmeisturunum. Eftir markalausan fyrri hálfleik kom Gísli Ólafsson HK yfir á 56. mínútu og Hörður Már Magnússon bætti við forystuna þegar hann skoraði úr vítaspyrnu 2 mínútum síðar. Stefán Eggertsson gulltryggði sigur HK á 86. mínútu þegar hann skoraði þriðja mark Kópavogsliðsins sem er greinilega á réttri leið en liðið komst alla leið í undanúrslit bikarkeppninnar síðasta sumar. Þrír leikir fara fram í riðlinum í dag. Nú kl. 15 mætast Fram og Keflavík í Fífunni og í Boganum á Akueyri mætast Völsungur og KA kl. 17.15. HK er efst með 6 stig eftir 3 leiki, KR og Keflavík koma næst með 5 stig eftir 3 leiki og Völsungur í 4. sæti með 4 stig einnig eftir 3 leiki. KA í 5. sæti með 2 stig eftir 2 leiki, FH í 6. sæti með 2 stig eftir 3 leiki eins og Fram sem er í sjöunda og næst neðsta sæti. Þróttur Reykjavík situr á botninum með 1 stig eftir 2 leiki. Einn leikur fer fram í deildarbikarkeppni kvenna í kvöld þegar Haukar og Keflavík mætast í Fífunni kl. 20.00 en keppni í kvennaflokki hófst nú um helgina.