Plata Helga Björnssonar í mörgum pökkum

Einn kaupandi var af fjórum af hverjum tíu plötum Helga Björnssonar fyrir jólin. Kaup stórfyrirtækja á diskum og bókum skekkja myndina þannig að sölutölur lýsa ekki endilega vinsældum listamannanna. Í raun er helst að marka lista sem tekinn er saman um plötur sem seldar eru yfir búðarborðið.

FL Group keypti 3000 eintök af geislaplötu Garðars Thórs Cortes fyrir jólin sem er tæplega 17% af sölunni en platan hefur selst í um 18 þúsund eintökum. Fyrirtækið keypti einni 4000 eintök af geislaplötunni Yfir Esjuna með Helga Björnssyni sem er um 40% af heildarsölu þeirrar plötu en talið er að hún hafi selt í um 10 þúsund eintökum. Gjöfunum er ekki hægt að skipta þar sem merki FL Group eða dótturfyrirtækja er prentað á albúmin. Plata Garðars Thórs seldist best fyrir jólin. En að sögn Eiðs Arnarssonar, dreifingarstjóra hjá Senu er plata Garðars sennilega með mest seldu plötum undanfarinna ára á Íslandi.

Eiður segir að hægt sé að fylgjast með vinsældarlistum sem birtist vikulega til að sjá hvað fólk sé að kaupa í verslunum. En listi birtist í Morgunblaðinu á fimmtudögum en á honum er Garðar Thór í fyrsta sæti með um 18 þúsund eintök seld. Björgvin Halldórsson er í öðru sæti með Ár og öld en um 12 þúsund eintök hafa verið seld af þeirri plötu. Þriðja sæti vinsældarlistans verma þau Guðrún Gunnarsdóttir og Friðrik Ómar en planta þeirra hefur selt í um átta þúsund eintökum. Hjálmar eru í fjórða sæti en tæplega sex þúsund eintök hafa verið seld af plötunni þeirra. Fimmta vinsælasta platan er Jólin koma með systkinunum KK og Ellen en ekki tókst að fá upplýsingar um sölutölur hjá útgefanda í dag. Plata Helga Björnssonar sem hefur selst í um tíu þúsund eintökum nær þó ekki nema 20. sæti vinsældarlistans. Þá er það platan Tónmilda Ísland sem nær ekki inn á vinsældarlistann þrátt fyrir að hafa selst í nærri fimmtán þúsund eintökum en 60% voru seld beint til fyrirtækja.