Settu sjö Íslandsmet í Laugardal

Sjö Íslandsmet féllu á fyrsta keppnisdegi Íslandsmótsins í sundi í Laugardalslaug í gær. Anja Ríkey Jakobsdótir, Ægi, tvíbætti metið í 50 metra baksundi, synti á 30,48 sekúndum í úrslitum. Jakob Jóhann Sveinsson, Ægi, og Jón Oddur Sigurðsson, Íþróttabandalagi Reykjanesbæjar, bættu báðir metið í 50 metra bringusundi í undanrásum en Jakob Jóhann bætti metið síðan í úrslitasundinu, synti á 28,86 sekúndum. Þau Jakob Jóhann og Anja Ríkey voru einnig í boðssundsveit Ægis sem bætti metið í 4x200 metra skriðsundi karla og kvenna. Úrslit réðust í 14 greinum í gær og uppskera Sundfélagsins Ægis var sérlega glæsileg. Ægismenn sigruðu í sjö greinum en Sundfélag Hafnarfjarðar í fjórum, þar af sigraði Örn Arnarsson í þremur þeirra. Keppni heldur áfram í dag og úrslitasundin hfejast klukkan 16.30 en úrslit ráðast í 12 greinum í dag. Nú rétt áðan bætti Anja Ríkey Jakobsdóttir Íslandsmet Kolbrúnar Ýrar Kristjánsdóttur í 100 metra baksundi um 13 hundraðshluta úr sekúndu þegar hún kom í mark á 1:05,61 í undanrásum.