Forðist beina snertingu við fugla

Embætti yfirdýralæknis sendi í dag frá sér leiðbeiningar til ferðamanna um það hvernig þeir skuli haga sér á ferðalögum þar sem fuglaflensa geisar og fuglar og alifuglar eru drepnir í stórum stíl. Þau lönd þar sem staðfest er að fuglaflensa geisi eru Norður Kórea, Víetnam, Taíland, Kína, Indónesía, Pakistan, Kambódía og Laos. Ekki eru í gildi neinar takmarkanir á ferðum fólks til þessara landa en embætti yfirdýralæknis vill benda fólki á að fuglaflensa er ekki hættuleg fólki við venjulegar aðstæður en veiran sem veldur sjúkdómnum skilst út í miklu magni gegnum saur smitaðra fulga. Ferðamönnum er ráðlagt að forðast beina snertingu við lifandi fugla til dæmis á mörkuðum þar sem lifandi fiðurfénaður er seldur. Veiran þolir ekki suðu þannig að hættulaust er að borða soðnar fuglaafurðir og sama gildir um egg. Ferðamönnum er einnig ráðlagt að þvo hendur vanlega og helst með spritti eða öðru sótthreinsandi efni komist þeir í snertingu við lifandi fiðurfénað. Einnig er ferðamönnum skylt að forðast beina snertingu við fiðurfénað hérlendis í 48 tíma eftir heimkomuna hafi þeir komist í snertingu við fugla eða alifugla erlendis.