Slær varnagla við einkavæðingu

Þorgerður Katrín Gunnarsdóttir, nýkjörinn varaformaður Sjálfstæðisflokksins, segir það ekki forngangsmál að selja hlut ríkisins í Landsvirkjun eins og ályktað var um á Landsfundi flokksins um helgina og Geir H. Haarde nýkjörinn formaður gerði að sérstöku umtalsefni í ræðu sinni á laugardag. Sjálfstæðismenn vilja Íbúðalánasjóð út af almennum húsnæðislánamarkaði og leggja niður stimpilgjöld. Þorgerður Katrín Gunnarsdóttir Menntamálaráðherra fékk rúmlega sextíu og tvö prósent atkvæða í varaformannskjöri flokksins á landsfundinum í gær og Geir H Haarde var kjörinn formaður með 94% atkvæða. Fjölmargar ályktanir voru samþykktar Landsfundinum. Í ályktun flokksins varðandi Orkumál ber hæst að samkvæmt henni beri að huga að einkavæðingu orkufyrirtækja að því marki sem hægt er að einkavæða slík fyrirtæki og er Landsvirkjun þar sérstaklega nefnd. Þessi bókun er í takt við ræðu Geirs Haarde, nýkjörins formanns, frá því á laugardag þar sem hann ræddi meðal annars um einkavæðingar síðustu ára og nauðsyn þess að henni verði framhaldið. Nefndi nýkjörinn formaður Landsvirkjun sérstkalega í því sambandi. Þorgerður Katrín Gunnarsdóttir, nýkjörinn varaformaður flokksins, var gestur í Íslandi í Bítið í morgun. Kvað við annan tón hjá Þorgerði Katrínu þegar hún var spurð um einkavæðingu Landsvirkjunar eins og Landsfundur hafði ályktað um. Þorgerður sagði að fyrir sitt leyti væru önnur mál brýnni en einkavæðing Landsvirkjunar og fara ætti varlega í slíkan gjörning, sem hún "liti á sem lengritíma mál." Sjálfstæðismenn vilja einnig að stimpilgjöld verði felld niður í núverandi mynd. Fyrir fundinum lágu drög að ályktun í sama málaflokki þar sem einungis var gert ráð fyrir því að fella bæri stimpilgjöld niður þegar aðstæður leyfðu. Landsfundargestum virðist sem þar með hafi ekki verið nægilega vel gert og var því textanum breytt á þann veg að fella bæri gjöldin niður hið fyrsta. Landsfundurinn samþykkti líka ályktun þar sem hvatt er til þess að fallið verði frá áformum um að afnema svonefndan bensínstyrk til öryrkja, eins og lagt er til í fjárlagafrumvarpinu og jafnframt að svonefndur hærri bílastyrkur til fatlaðra verði hækkaður. Meðal annarra athygliverðra ályktana er ályktun varðandi Íbúðalánasjóð, sem landsfundurinn vill að fari út af lánamarkaði en tryggi í staðinn bönkum og lánastofnunum fjármagn til húsnæðislána á lægstu mögulegu vöxtum. Einnig ber talsvert nýrra við í ályktun flokksins varðandi sölu á áfengi en þar vilja Sjálfstæðismenn að áfengissala verði gefin frjáls og ríkiseinokun verði þar með aflétt með öllu.