Leggur ekki árar í bát

"Ég vona bara að þetta verði til þess að lögregla og yfirvöld taki harðar á þessum málum og ekki þurfi alltaf að verða slys eða óhöpp til að menn vakni af værum blundi," segir Björn Hafsteinsson strætisvagnabílstjóri. Björn er smám saman að jafna sig eftir árekstur strætisvagns sem hann ók og vörubíls hinn 19. ágúst á gatnamótum Laugavegar, Kringlumýrarbrautar og Suðurlandsbrautar. Slysið kostaði Björn báða fætur fyrir neðan hné. Þrátt fyrir slysið er Björn brattur enda segir hann sjálfur að ekkert þýði að leggja árar í bát. "Það hefur ekkert upp á sig. Lífið heldur áfram og nú eru læknarnir farnir að máta hulsur á mig og ekki líður á löngu áður en ég fer að læra að ganga á ný. Uppgjöf gefur mér ekki nokkurn skapaðan hlut en bjartsýnin hjálpar." Hann segist hafa fengið mikinn stuðning frá konu sinni og öllum félögum hjá Strætó eftir slysið og andlega líði honum bærilega. Hann er þó ómyrkur í máli þegar talið berst að slysinu sjálfu. Því man Björn glöggt eftir enda var hann með meðvitund þangað til hann var fluttur á slysadeild. "Ég man mætavel eftir árekstrinum og öllu sem gerðist strax í kjölfarið. Ég man að ég reyndi meira að segja að fá aðstoð til að standa upp strax og aðgæta hvort farþegarnir í strætisvagninum væru ómeiddir. Það gladdi mig að heyra að enginn hefði fengið meira en skrámur. Hins vegar finnst mér dapurt að heyra að óskoðaðir og ótryggðir bílar aki um á götunum og það er eins og alltaf þurfi að komi til alvarlegt slys áður en yfirvöld og lögreglan taka á málum sem þessum." Fram kom í kjölfar slyssins að ökumaður vörubílsins hafði ekki hirt um að færa bifreið sína til skoðunar og ökutækið var ótryggt. Um helgina fara fram tónleikar til styrktar Birni sem félagar hans og velunnarar hafa skipulagt á Broadway en allur ágóði af þeim rennur beint til Björns og fjölskyldu hans.