Hyggjast sniðganga kosningar

Íranar hyggjast margir hverjir sniðganga kosningar á morgun þar sem þeir vilja breytingar í landinu. Þeir eru hins vegar ekki sammála um hvaða breytingar. Hver sem verður kosinn, munu harðlínumenn eftir sem áður ráða mestu. Kosningabaráttunni í Íran er nú lokið en kosning hefst í fyrramálið. Kjósa á eftirmann Mohammeds Khatamis sem má ekki bjóða sig fram aftur. Kannanir benda til þess að Akbar Hashemi Rafsanjani, sem var forseti Írans á árunum 1987-1997, njóti mesta fylgisins af frambjóðendunum sjö, en hann þykir hófsamur klerkur. Talið er víst að efna þurfi til annarrar umferðar kosninganna til að einhver frambjóðandinn hljóti nægilegt fylgi. Það setur einnig strik í reikninginn að aðeins er búist við ríflega helmingskjörsókn. Ungt fólk, sem er um helmingur allra Írana, sýnir kosningunum lítinn áhuga. Algengt er að það líti svo á að umbætur fáist ekki fram með þeim hætti. Um 500 manns mótmæltu í Teheran í gær og hvöttu til þess að kosningarnar yrðu sniðgengnar. Ástæðurnar voru þó nokkuð ólíkar. Sumir sögðust mótmæla þar sem þeim líkaði ekki við klerkana í ríkisstjórninni og að þá langaði til að kjósa lýðræðislega ríkisstjórn. Aðrir ákölluðu Rafsanjani og bentu honum á hvernig komið væri fyrir landinu. Íranskar stúlkur væru fluttar yfir landamærin til Dúbaí án þess að nokkuð væri gert. Hver sem verður forseti verður þó ofurseldur varðaráðinu, en harðlínumennirnir þar eru í raun þeir sem ráða í Íran.