Ormagöngin óhentug

Breskir og bandarískir vísindamenn hafa komist að þeirri niðurstöðu að svonefnd ormagöng séu ekki hentug til tímaferðalaga. Sumar kenningar heimsfræðinnar gera ráð fyrir að ormagöng í geimnum geri manni kleift að komast á milli fjarlægra staða í geimnum á örskotsstundu, jafnvel í framtíð eða fortíð. Gert er ráð fyrir að með einhvers konar framandi efni sem er fráhverft þyngdarafli sé hægt að opna þau. Á vef BBC kemur hins vegar fram að vísindamenn telji nú að göngin séu ýmist of þröng til að koma frumeindum þar inn – hvað þá mönnum – eða of óútreiknaleg til að treystandi sé á að maður komi út á þeim tíma sem maður óskaði sér.