Segja al-Zarqawi sáran

Hópur á vegum al-Qaida samtakanna í Írak greindi frá því í dag að Abu Musab al-Zarqawi, leiðtogi samtakanna í landinu, væri særður. Í yfirlýsingu frá hópnum sem birt var á heimsíðu íslamskra öfgamanna kemur þetta fram en þar eru múslímar hvattir til að biðja fyrir leiðtoganum. Ekki hefur fengist staðfest hvort yfirlýsingin er ófölsuð. Talsmaður Bandaríkjahers í Bagdad sagði herinn ekki hafa fengið neinar upplýsingar um það hvort al-Zarqawi væri sár en að hann væri enn efstur á lista Bandaríkjamanna yfir eftirlýsta menn í landinu. Þá sagði hann að þetta væri ekki í fyrsta sinn sem fréttir bærust af því að leiðtoginn hefði særst og að það væri nánast ómögulegt að staðfesta þær. Hugsanlega væri þettta liður í einhverju ráðabruggi hryðjuverkasamtakanna.