Handtóku mannréttindafrömuð

Stjórnvöld í Úsbekistan hafa handtekið mannréttindafrömuð sem greindi fréttamönnum frá því þegar úsbekskar hersveitir skutu á og drápu mótmælendur í borginni Andijan um miðjan mánuðinn. Frá þessu greina mannréttindasamtökin Huma Rights Watch og krefjast þess að manninum verði sleppt tafarlaust. Samtökin segja að yfirvöld í Úsbekistan reyni með þessu hindra að umheimurinn fái nákvæmar lýsingar á því sem gerðist 13. maí í Andijan. Talið er að úsbekskar hersveitir hafi skotið hátt í 500 manns til bana, þar á meðal konur og börn, í mótmælunum sem m.a. beindust gegn forsetanum Íslam Karímov. Forsetinn segir hins vegar að 169 hafi látist, flestir þeirra íslamskir öfgamenn. Farið hefur verið fram á alþjóðlega rannsókn á atburðunum en yfirvöld í Úsbekistan hafna því alfarið.