Hopkins boxar gegn Taylor í júlí

Bernard Hopkins mun boxa gegn Jermain Taylor þann 16. júlí næstkomandi. Hopkins er handhafi WBC, IBF, WBA og WBO beltanna í millivigt og verða þau öll undir í bardaganum. Hinn fertugi Hopkins, sem síðast barðist í febrúar er hann sigraði Howard Eastman á stigum, stefnir að því að hætta í byrjun næsta árs. Taylor, sem er 26 ára og ósigraður í 23 bardögum þar sem hann hefur meðal annars sigrað Daniel Edouard og William Joppy, er talinn gríðarlega góður boxari og fróðir menn segja hann þann eina sem ógnað getur Hopkins.