Lofar lögum um starfsmannaleigur fyrir jól

Ríkisstjórnin situr hjá, á meðan glæpafyrirtæki brjóta á fátæku, erlendu verkafólki, segir Össur Skarphéðinsson, og vill lög hið snarasta. Félagsmálaráðherra segir að íslensk fyrirtæki sem taka þátt í vitleysunni ættu að skammast sín, öllum beri að virða leikreglur á vinnumarkaði enda sé Ísland ekkert fríríki í þessum efnum. Hann lofar lögum um starfsmannaleigur fyrir jól.

Ísland er gróðrastía fyrir ófyrirleitnar starfsmannaleigur sagði Össur Skarphéðinsson, þingmaður Samfylkingarinnar, í utandagskrárumræðuá Alþingi í morgun.Hann kallaði það villimennsku þegar mannréttindi væru brotin á fátæku, erlendu verkafólki og þegar vinnuafl fólks frá atvinnuleysislöndum væri selt á verði sem væri stundum langt undir umsömdum taxta. Hann kallaaði það líka villimennsku þegar útlendir verkamenn væri látnir búa við aðstæður sem Íslendingar myndu stundum segja að væru varla hundum bjóðandi. Þá væri það villimennska þegar veikindaréttur og orlof væri ekki virt og þegar menn kæmust upp með það að gjalda keisaranum ekki það honum væri.

Össur sagði bráðvanta lög um starfsmannaleigur. Ríkisstjórnin sæti hjá og þar með fengju glæpafyrirtæki, eins og Össur orðaði það, svigrúm til að brjóta á erlendu verkafólki. Hann krafðist þess að Árni Magnússon félagsmálaráðherra léti hendur standa fram úr ermum og kæmi fram með ný lög hið fyrsta.

Össur veit hvað hann vill hafa í þessum lögum. Hann sagði að þau yrðu að tryggja að það væri skylt fyrir starfsmannaleigur að hafa starfsleyfi svo hægt væri að útiloka þær sem yrðu uppvísar að því að brjóta samninga og réttindi á verkamönnum og jafnvel hvetja til þess að þeir yrðu lamdir.

Árni Magnússon félagsmálaráðherra áréttaði að það væri skýrt að starfsmannaleigur ættu líkt og aðrir að fara að íslenskum lögum. Það giltu tilteknar leikreglur á íslenskum vinnumarkaði sem leikmenn þyrftu að virða. Það væri mikilvægt að samtök aðila vinnumarkaðarins héldu þeim mikilvægu grundvallarhlutverkum sínum við að halda uppi skipulagi á vinnumarkaði og þar með því vinnumarkaðskerfi sem Íslendingar hefðu þróað í sameiningu í tugi ára. Kerfi sem Íslendingar ætluðu að varðveita.

Ráðherrann hrósaði verkalýðshreyfingunni en skammaði þau íslensku fyrirtæki sem taka þátt í vitleysunni. Hann sagði lög á leiðinni og að hann stefndi að því að leggja fram frumvarp um starfsmannaleigur fyrir jólahlé. Hann gæti eðli málsins samkvæmt ekki upplýst þingmenn um efni þess enda væru ákveðin atriði nú í skoðun hjá þeim aðilum sem hefðu komið að málinu.