Mæður og ömmur grétu

Mæður og ömmur grétu í dómsal í Suður-Ossetíu í dag þegar eini eftirlifandi tsjetsjenski skæruliðinn, sem gerði árás á grunnskólann í Beslan á síðasta ári, var leiddur fyrir dómara. 330 létust í árásinni, helmingurinn börn. Nur-Pashi Kulayev er tuttugu og fjögurra ára gamall. Hann var einn þeirra þrjátíu og þriggja skæruliða sem réðist inn í Beslan-skólann og sá eini sem lifði af. Kulayev hafði skriðið í felur þegar hersveitir gerðu áhlaup á skólann en íbúar í Beslan fundu hann og hefðu tekið lögin í sínar eigin hendur ef sérsveitarhermenn hefðu ekki komið honum til bjargar. Hann á nú yfir höfði sér lífstíðarfangelsi. Kulayev hefur játað að hafa tekið þátt í árásinni en segist engan hafa drepið. Hann segir að hópurinn hafi fengið þá skipun frá æðstu leiðtogum Tsjetsjena að koma af stað allsherjarborgarastríði. Ættingjar fórnarlambanna í Beslan, aðallega mæður og ömmur þeirra sem létust, fjölmenntu við réttarhöldin í dag og héldu á myndum af þeim sem létust. Margir hafa hins vegar krafist þess að fleiri en Kulayev verði dregnir til saka fyrir þetta hryðjuverk því ljóst þykir að sök liggur einnig að einhverju leyti hjá spilltum embættismönnum.