Þorvaldur hættir með KA

Þorvaldur Örlygsson, knattspyrnuþjálfari 1. deildarliðs KA er að hætta með liðið og við því tekur Guðmundur Valur Sigurðsson, fyrrverandi þjálfari Grindavíkur. Ástæða þess er þó ekki skyndileg en til þessa hefur staðið vegna veikinda dóttur Þorvaldar. Hann mun stýra liðinu gegn Völsungi í deildinni næsta fimmtudag en að þeim leik loknum láta formlega af störfum. Stjórn knattspyrnudeildar KA sendi í dag frá sér fréttatilkynningu þess efnis. Fréttatilkynningin: "Þorvaldur Örlygsson hefur óskað eftir því við stjórn knattspyrnudeildar KA að láta af starfi þjálfara meistaraflokks KA í knattspyrnu. Ástæða þessarar óskar Þorvaldar eru veikindi dóttur hans. Á fundi Þorvaldar og stjórnar knattspyrnudeildar KA í dag var ákveðið að hann stjórni KA-liðinu í leik þess við Völsung á Húsavík nk. fimmtudag, 14. júlí, og hætti síðan þjálfun liðsins. “Fyrr í sumar var ljóst að vegna veikinda dóttur minnar myndi ég ekki geta lokið því verkefni sem ég hafði tekið að mér, að þjálfa meistaraflokk KA út þetta keppnistímabil. Það var því sameiginleg niðurstaða mín og stjórnar knattspyrnudeildar KA að ég hætti þjálfun liðsins núna á miðju keppnistímabili, þannig að nýjum þjálfara gefist gott svigrúm til þess að vinna með liðið samkvæmt sínum áherslum,” segir Þorvaldur Örlygsson. Þorvaldur hefur verið þjálfari meistaraflokks KA undangengin fimm ár. Knattspyrnudeild KA færir honum bestu þakkir fyrir samstarfið og vel unnin störf í þágu félagsins og óskar honum og fjölskyldu hans velfarnaðar. Við þjálfun KA-liðsins tekur Guðmundur Valur Sigurðsson, sem tók að sér þjálfun úrvalsdeildarliðs Grindavíkur á miðju keppnistímabili í fyrra. Hann hafði einnig komið áður að þjálfun Grindavíkurliðsins sem aðstoðarþjálfari Bjarna Jóhannssonar, þáverandi þjálfara Grindavíkur. Guðmundur Valur hefur einnig reynslu af þjálfun yngri flokka. Þá hefur hann mikla reynslu sem leikmaður, síðast spilaði hann í efstu deild með FH Guðmundur Valur er ráðinnn sem þjálfari KA til loka yfirstandandi keppnistímabils." KA er í 3. sæti 1. deildar karla með 14 stig eftir 9 umferðir á eftir Víkingi R með 16 stig og toppliði Breiðabliks með 22 stig.