Láta draga bílana burt?

Íbúar í Hlíðahverfi mótmæltu harðlega á fundi sínum í gærkvöld fyrirhuguðum framkvæmdum 365 miðla á lóðinni við Skaftahlíð 24. Íbúarnir vilja að framkvæmdirnar verði stöðvaðar. Forystumenn íbúanna hvetja til þess að íbúar láti draga burt alla bíla sem lagt hefur verið ólöglega. Hiti var í fundarmönnum á fjölmennum íbúafundi sem var haldinn í Ísaksskóla í gærkvöld og var Guðlaugur Þór Þórðarson, borgarfulltrúi sjálfstæðismanna, til dæmis spurður að því hvort hann væri tilbúinn til að stuðla að því að banna starfsmönnum 365 að koma á einkabílum í vinnuna. Annar fundarmaður benti á að þá þyrfti að banna kennurum í Kennaraháskólanum að mæta til vinnu á bíl og foreldrum barna í Ísaksskóla að keyra börnin í skólann. Á fundinum kom einnig fram að umferð á svæðinu myndi líklega aukast um tíu prósent, eða þrjú hundruð bíla á dag, til viðbótar við það sem fyrir er. Forystumenn íbúanna hvöttu íbúa til að láta skoðun sína í ljós, til dæmis með því að tala við sína kjörnu fulltrúa og með því að láta draga burtu bíla starfsmanna sem hefur verið lagt ólöglega. Fyrirhugað er að reisa tæplega tvö þúsund fermetra bílastæðahús og átta hundruð fermetra tengibyggingu á lóð fasteignafélagsins Stoða á lóðinni við Skaftahlíð 24. Íbúar eru sumsé mótfallnir þessum framkvæmdum og hafa sent kæru til úrskurðarnefndar skipulags- og byggingamála þar sem þeir krefjast þess að framkvæmdirnar verði stöðvaðar meðan málið er til meðferðar. Íbúarnir telja ýmislegt aðfinnsluvert við meðferð málsins hjá borgaryfirvöldum og gagnrýna harðlega að fjölmargar athugasemdir síðustu misseri hafi ekki verið teknar til greina.