Saklaus í svikamyllu smyglara

 Breskur kviðdómur sýknaði í gærdag íslensku unglingsstúlkuna sem ákærð var fyrir að smygla kókaíni til Bretlands í vor. „Hún er þar með laus allra mála,“ segir lögmaður hennar, Aika Stephenson hjá breska lögfræðifyrirtækinu Lawrence & Co. í samtali við Fréttablaðið. Stúlkan, sem var 16 ára við handtöku en er nýorðin 17 ára, var ákærð fyrir að hafa smyglað 250 grömmum af kókaíni í skósóla sínum frá Amsterdam til London í maí síðastliðnum, að andvirði um 1,3 milljónum íslenskra króna. Fyrir kviðdómi Inner London Crown Court játaði hún aðild sína að málinu en útskýrði jafnframt að hún hefði flækst í svikamyllu fíkniefnasmyglara. Hún teldi sig hafa verið að smygla peningum frá Hollandi til fátækrar fjölskyldu í Glasgow og fyrir það hefði hún átt að fá jafnvirði 10.000 íslenskra króna. Hún var handtekin á Waterloo lestarstöðinni við komuna til Englands og hefur verið í haldi lögreglu síðan þá. „Hún sagði kviðdómnum að hún hefði ekki vitað um eiturlyfin í skónum og kviðdómurinn trúði henni,“ segir Stephenson.