Enginn fundur ákveðinn

Ekki búið að ákveða hvort eða hvenær fundur verður hjá forsvarsmönnum atvinnurekenda, verkalýðshreyfingar og ríkisstjórnar, en nú er aðeins vika þar til forsendunefnd á að skila niðurstöðum sínum.

Nefndin ákveður hvort forsendur kjarasamninga eru brostnar. Komist nefndin að þeirri niðurstöðu verður samningum sagt upp. Grétar Þorsteinsson, forseti Alþýðusambands Íslands, sagði eftir fund ASÍ og ríkisstjórnarinnar í síðustu viku að hann teldi allar líkur á því að samningum verði sagt upp, eins og staðan var eftir fundinn með ríkisstjórnini.

Verkalýðshreyfingin vill að ríkisvaldið taki á sig hluta af greiðslum örorkubóta lífeyrissjóðanna, sem hafa stóraukist undanfarin ár, þannig að skerða þarf útgreiðslur til sjóðsfélaga á sama tíma og lífeyrissjóðir hins opinbera eru ríkistryggðir. Þá er uppi krafa um að atvinnuleysisbætur verði tekjutryggðar. Atvinnurekendur benda á að staða krónunnar sé orðin svo sterk, að mörg fyrirtæki seú við það að komast í þrot þannig að ekki sé svigrúm til launahækkana að óbreyttu. Að þessu samanlögðu viðrast flest spjót beinast að ríkisvaldinu. Ekki hefur náðst samband við forsætisráðherra vegna málsins.