7-10% sjúklinga fá lyf hjá læknum

Fíkniefnaneytendur sem fá lyf ávísuð af læknum eru um 7-10 prósent af sjúklingafjölda meðferðarstofnunarinnar á Vogi. Frá árinu 1995 hafa 769 ópíumfíklar komið til meðferðar á stofnuninni. Þetta kom fram á blaðamannafundi sem Þórarinn Tyrfingsson, yfirlæknir SÁÁ, hélt í dag. Þórarinn segir að mjög erfitt sé að koma ráðamönnum og þjóðinni í skilning um versnandi vanda í fíkniefnaheiminum. Hann segir að þegar litið sé á tölur aftur í tímann sjáist mjög greinilega hvernig vandinn hefur vaxið. Þórarinn segir nauðsynlegt að bregðast við með aukinni skyndiþjónustu fyrir fíkniefnaneytendur og auka aðhald í lyfjaverslun og útgáfu lækna á lyfseðlum til fíkniefnaneytenda.