Snúa aftur til síns heima í Texas

Íbúar á þeim svæðum í Texas í Bandaríkjunum sem urðu hvað verst úti þegar fellibylurinn Ríta gekk yfir á laugardag eru nú þegar byrjaðir að snúa aftur til síns heima. Litlir bæir og héruð í grennd við ströndina sem liggur að Mexíkóflóa hafa orðið fyrir miklu tjóni, en svo virðist sem borgir og aðrir stórir þéttbýlisstaðir hafi orðið fyrir minni skemmdum en búist var við. Lögreglu- og björgunarmenn vinna hörðum höndum að því að rýma vegi sem eru fullir af braki og trjám og jafnframt er unnið að því að koma rafmagni aftur á hjá þeim hundruðum þúsunda heimila og fyrirtækja sem urðu fyrir barðinu á Rítu.