Sala á Tamiflu tekur kipp

Sala á flensulyfinu Tamiflu hefur tekið kipp hér á landi vegna frétta af fuglaflensu undanfarið. Læknar segja marga ruglaða í rýminu og ekki vita að flensan berist ekki enn á milli manna.

Í bæði Danmörku og Noregi hefur fólk hamstrað flensulyfið Tamiflu undanfarið, í þeim tilgangi að vera við öllu búið ef fuglaflensufaraldur breiðist út. Þannig er lyfið til að mynda uppselt hjá heildsölum í Danmörku og í Noregi hafa ápótekin vart undan vegna eftirspurnar.

Þótt salan sé öllu rólegri hér á landi, er hún samt miklu meiri en alla jafna á þessum árstíma. Í heilsugæslunni í Árbæ hafa verið pantaðir meira en helmingi fleiri skammtar af Tamiflú en í venjulegu árferði. Læknar þar segja marga koma og spyrjast fyrir um meðul við fuglaflensu og almennt sé fólk ansi ruglað í rýminu. Það geri ekki greinarmun á fugleflensunni sem nú herji á dýrin og þeirri stökkbreyttu útgáfu sem kynni að breiðast á milli manna. Margir standi í þeirri trú að flensan smitist þegar beint á milli manna.

Á nokkrum heilsugæslustöðvum sem fréttastofa hafði samband við í gær sögðu læknar að margir sem fengju hefðbundna flensusprautu spyrðust fyrir um hvort hún dyggði líka gegn fuglaflensu. Þá er líka eitthvað um að fólk hringi á heilsugæslustöðvar, til að spyrjast fyrir um varnir gegn fuglaflensu.

Í Lyfju í Kópvaogi hefur orðið marktæk aukning á sölu Tamiflu. Þar á bæ segja starfsmenn að miklu fleiri skammtar hafi selst undanfarna tvo mánuði en alla jafna. Venjulega sé lítið keypt af flensulyfjum í september og október, en hún aukist síðan þegar nær dregur jólum. Nú sé þessu hins vegar öðruvísi farið og þegar hafi töluvert selst af flensulyfjum, einkum Tamiflu.