Örykjum hafi fjölgað um þrjá hvern virkan dag frá áramótum

Bílastyrkur til hreyfihamlaðra og aldraðra verður ekki afnuminn. Þetta tilkynnti Jón Kristjánsson, heilbrigðisráðherra á Alþingi í dag þegar hann svaraði spurningum Helga Hjörvars við utandagskrárumræðu um fjölgun öryrkja og kjör þeirra. Ráðherra sagðist aldrei hafa haldið því fram að fólk færi á örorkubætur að gamni sínu, en benti á að öryrkjum hafi fjölgað um þrjá hvern virkan dag frá áramótum til 1. október og við því yrði að bregðast með einhverjum hætti.

Helgi Hjrövar, þingmaður Samfylkingarinnar bað um umræðuna og gagnrýndi heilbrigðisráðherra harkalega, einkum fyrir skort á samráði við öryrkja. Helgi sagði ráðherrann hafa látið vinna áróðursskýrslu um það hvað öryrkjar hefðu mikinn ágóða af örorkunni og hve þeim fjölgaði óeðlilega án þess að hafa um það nokkurt samráð við heildarsamráð fatlaðra.

Heilbrigðisráðherra sagði af og frá að umrædd skýrsla frá í vor hefði verið gerð í áróðursskyni. Fram hjá því yrði einfaldlega ekki horft að öryrkjum hefði fjölgað mjög undanfarin ár. Hann sagði þó að vísbendingar væri um að það væri að hægja á fjölguninni á þessu ári en samt sem áður hefði örorkulífeyrisþegum fjölgað úr 12.050 í 12.627 miðað við útgreiðslu Tryggingastofnunar ríkisins á fyrstu níu mánuðum ársins. Fjölgunin væri um 4,8 prósent sem svaraði til þess að öryrkjum hefði fjölgað um þrjá hvern virkan dag frá áramótum til 1. október.

Það sem vakti þó mesta athygli í máli ráðherra var þó yfirlýsing hans um að bílastyrkur til hreyfihamlaðra og aldraðra yrði ekki afnuminn. Þessu fögnuðu þingmenn mjög, ekki síst málshefjandinn Helgi Hjörvar. Hann sagði lýðræðið hafa virkað. Enn fremur sagði hann að þegar fulltrúar í fjárlaganefnd hefðu séð tillöguna í fjárlagafrumvarpinu, að svipta ætti hreyfihamlaða bensínstyrk, þá hafi hann haldið að menn úr öllum flokkum hafi orðið undrandi og ekki síður Öryrkjabandalagið.

Sú umræða sem farið hefði fram síðan á þingi, og þó einkum hjá þjóðinni, hefði orðið til þess að horfið hefði verið frá þessum fráleitu skerðingarhugmynd. Hann fagnaði því og þakkaði heilbrigðisráðherra fyrir að hafa tekið af skarið um málið og dregið skeringuna til baka. Hann minnti þó ráðherra á að hefði hann gætt samráðs um þessa hugmynd þá hefði hann aldrei sett hana fram í upphafi og því hefðu menn losnað við karpið og gefið sig að meira skapandi verkefnum á þinginu.