Bandarísk stjórnvöld hafi leyfi íslenskra til fangaflugs

Össur Skarphéðinsson fullyrðir á heimasíðu sinni að bandarísk stjórnvöld hafi formlegt leyfi íslenskra stjórnvalda til að fljúga með meinta hermdarverkamenn í haldi um Ísland. Þetta megi lesa út úr yfirlýsingu Davíðs Oddssonar, þáverandi forsætisráðherra, frá 18. mars 2003, sem birt hafi verið á vef Hvíta Hússins 26. mars sama ár.

Yfirlýsingin sem um ræðir tengis aðdraganda innrásarinnar í Írak og þar segir Davíð að Bandaríkin telji öryggi sínu ógnað alvarlega vegna gjörða og árása hryðjuverkamanna og vegna ýmissa ógnana frá löndum sem einræðisherrar stjórni. Bandaríkin telji að stuðningur frá litlu landi skipti máli og að íslensk stjórnvöld muni áfram halda náinni samvinnu við Bandaríkjamenn. Í því felist meðal annars heimild til flugs í lofthelgi Íslands og til lendinga á Keflavíkurflugvelli.

Össur segir í grein sinni að í yfirlýsingu Davíðs séu engin skilyrði sett. Enginn ætli þó að íslensk stjórnvöld hafi fremur en aðrir gert sér í hugarlund að heimildin yrði hugsanlega nýtt til að flytja um Ísland fanga á leið í leynileg fangelsi þar sem pyndingum yrði hugsanlega beitt við yfirheyrslur og íslensk stjórnvöld þannig gerð samsek um brot bæði á íslenskum lögum og alþjóðasamningum.

Hann túlki yfirlýsinguna svo að íslenska ríkisstjórnin virðist hafa heimilað að flugvélar Bandaríkjastjórnar noti Ísland í baráttunni gegn hermdarverkum víðs vegar um heiminn. Sú barátta sé enn í fullum gangi og að íslenska ríkisstjórnin hafi ekki afturkallað þessa heimild. Því sé full ástæða til að ætla að Bandaríkjamenn telji sig í krafti yfirlýsingarinnar vera í fullum rétti þegar þeir lendi fangaflugvélum sínum á Íslandi, eða fljúga um íslenska flugstjórnarsvæðið. Íslenska ríkisstjórnin verði að afturkalla þessa heimild og það strax.