Börn gerast heimsforeldrar

"Við erum skátar og skátar eiga að hjálpa öðrum jafnvel þó þeir séu svona langt í burtu," segir Óskar Þór Þorsteinsson skáti úr Garðabæ og meðlimur í Ljósálfasveitinni Muggar. Sú sveit hefur nú tekið að sér það hlutverk að vera heimsforeldrar Önnu Karínu sem er tíu ára fátæk stúlka í El Salvador. Ábyrgðin kallar á heilmikla framtakssemi en börnin munu sjálf sjá um að styrkja stúlkuna og tryggja að hún geti gengið í skóla og haft í sig og á. Ljósálfarnir höfðu að þessu sinni safnað dósum og flöskum handa Önnu Karínu og hafði söfnunin tekist svo vel að heimsforeldrarnir ungu óðu dósir upp í ökkla þegar blaðamann bar að garði í Skátaheimili Vífils þar sem þeir hafast við. Ljósálfarnir voru allir sammála Óskari um að skátar ættu að hjálpa öðrum og nefndu þeir fjölmörg dæmi þess að þeir hefðu komið öðrum til hjálpar. „Einu sinni ætluðu milljón strákar að lemja einn strák en þá hjálpuðum við honum," segir Emil ljósálfur en Unnsteinn skátaforingi þykir þá sögurnar orðnar full magnaðar og hvetur þá til að halda áfram að telja.