Haldið í 30 klukkustundir

Tvítug stúlka, Arna Ösp Magnúsdóttir, var í fyrradag handtekin af ísraelskum landamæravörðum á Ben Gurion flugvellinum og virðist hafa verið vísað úr landi. Í tölvupósti sem hún sendi frá Sviss í gær sagði hún að sér hefði verið "haldið í 30 klst án þess að fá að hafa samband við neinn, ekki einu sinni konsúlinn." Hún segist hafa sætt tíu tíma stanslausri yfirheyrslu sem hafi verið mjög ógnandi. "Þegar ég minntist á réttindi var mér ýtt inn í klefa og tilkynnt að ég ætti engin réttindi." Arna var í Palestínu þrjá mánuði í síðasta sumar og starfaði þar á tímabili með alþjóðlegasamtökunum International Solidarity Movement sem eru á svörtum lista hjá ísraelskum stjórnvöldum, en nokkuð er um að þekktum félagsmönnum sé ekki hleypt inn í landið. Arna var handtekin hér á landi fyrir rúmum mánuði eftir að hafa slett litaðri súrmjólk yfir gesti á álráðstefnu í Nordica.